कुटुंबातील एखाद्या सदस्यावर अनंत अत्याचार केले जात असल्याचे प्रसंग आपण चित्रपट, मालिकांमधून पाहतो, कथा-कादंबऱ्यांमधून वाचतो; पण असे प्रत्यक्षात असते का, या प्रश्नाचे उत्तर सुगंधा चितळे-पांडे यांची ‘कर्मठकथा’ हे आत्मकथन वाचल्यावर मिळू शकेल.
व्यसनी वडिलांकडून क्षुल्लक कारणावरून लेखिकेच्या आईचा खून होतो. ते तुरुंगात गेल्यानंतर साडेतीन वर्षांची चिमुकली आणि सहा महिन्यांची तिची बहिण अनाथ होतात. तीन वर्षे अनाथाश्रमात घालविल्यानंतर त्या दोघी काकांच्या कोंडवाड्यात येतात. समाजात उच्च स्थान असलेल्या काकांच्या कृष्णकृत्यांचा पाढा यात वाचला आहे. कर्मठपणाच्या आडून पाप करण्यात काका व त्यांच्या कुटुंबाला कधीच गैर वाटत नसे. घरात कामाचा गाडा वाहत असूनही पुतण्यांना मारहाण, कुत्सित बोल चुकत नसे. लहान वयात लग्न लावून दिल्यावरही लेखिकेवरील संकटांची मालिका अखंडित राहते. पुढे मैत्रिण व तिच्या पतीच्या मदतीने थोडे सुखाचे दिवस येतात; मात्र दुसऱ्याच्या कुशीत दिलेल्या आपल्या छकुलीच्या आठवणीचे कढ तिला येतच राहतात.
पुस्तक : कर्मठकथा
लेखक : सुगंधा चितळे-पांडे
प्रकाशक : पब्लिक स्पीकर
पाने : १९२
किंमत : २५० रुपये
(हे पुस्तक ‘बुकगंगा डॉट कॉम’वरून घरपोच मागवण्यासाठी खालील लिंकवर क्लिक करा.)
